مصطلحات سودانية -الرحمتات

 

بتعرف الرحمتات ؟

- دي حاجه ليها علاقة بالرحمة!

= ااي صااح .. بتعرفها من وين

- لالا م بعرفها والله .. لكن كيف بلاي

= يااخ عليك الله اقعد سااي ..

- ههههههه طيب كدي احكي لي عنها معناها شنو ؟

= معناها (الرحمة جاات) اختصروها "بالرحمتات" وهي واحدة من العادات السودانية السمحه شدييد .. لكن للأسف شكلها كدا حتنتهي قريب.

- ليه .. هي شنو أصلاً ؟

= هي زي مناسبة كدا بعلموها مرة وااااحده في السنة لإحياء ذكرى المتوفيين وبتصدقو بإسمهم على الأطفال والمحتاجين والفقراء.

- طيب دي حاجه سمحه .. هل في ناس لسا مواصيلن فيها

= الناس في القرى لسا بعملوها .. لكن ناس المدن والعاصمة بقو ما بعملوها ومعظم هم ما بعرفوها.

= المناسبة دي خاصة بالناس العندهم شخص اتوفى في بداية رمضان أو قبل رمضان بفتره بسيطه.

هي بتتعمل متين قلت لي ؟

= عندها يوم واحد في السنة ..

- طبعاً دا يوم العيد صااح .. يوم الفرحه وكده

= لا لا اصبر شويه حوريك ..

= اخر خميس من رمضان ووقت الافطار تحديداً.

- اها وبعملو ليو شنو؟

= اصبر حبتين مالك مستعجل ..

- معليش اها قوول ..

= أهل المتوفي بشترو لحم وبعملو فتة أو سليقه وبوزعو معاها الحلو مر على المحتاجين.

= وطبعاً مالازم يعملو أكل بس .. ممكن يوزعو أي حاجه تانيه حابين يعملوها صدقه للمتوفي.

- الحاجه دي ما حصل سمعت بيها قبل كده

- وانت قلت انها ممكن تنتهي .. أكيد عشان فيها قروش وكدا صاح

= أي تخيل دا جذو من الاسباب

- طيب ليه ناس القرى لسا بعمولها رغم انه وضعهم الاقتصادي أقل من المدن والعاصمة؟

= سؤالك سمح صراحه ..

= الجواب انه ناس القرى تكافلهم أقوى من ناس المدن.

عرفت ؟

منقول